Një grabitje e madhe dhe e kryer në mënyrë spektakolare në mes të ditës ka ndodhur sot në Athinë në dyqanin zyrtar të një prej firmave më prestigjioze të orave, “Rolex”.
Katër persona të maskuar dhe të pajisur me pistoleta kanë mësyrë në dyqanin e ndodhur në rrugën Kolokotroni N-1 në sheshin Karytsi në orën 10:55.
Ata kanë neutralizuar menjëherë rojën e sigurisë dhe kanë kërcënuar më pas punonjësit e tjerë me armë, duke mos i lënë të kryejnë asnjë veprim.
Ata kanë thyer xhamin e vitrinës dhe kanë marrë ora me vlera të mëdha, të vlerësuara qindra mijëra euro. Informacionet paraprake janë që grabitësit të kenë marrë rreth 15-20 ora.
Në vendngjarje është gjetur një çekiç, ndërsa policia ka nisur hetimet për identifikimin e autorëve, teksa një operacion me përmasa të mëdha është në zhvillim.
