Rinovimi i Kylian Mbappé në maj ishte një nga lajmet më të mira të vitit për PSG-në, nëse jo më i miri. Sulmuesi, pas disa muajsh në të cilët e ardhmja e tij dukej e destinuar me fanellën e bardhë (Real Madridi), vendosi të zgjasë marrëdhënien me parizienët për dy vite, me një vit tjetër opsional.
Gazeta "Le Journal du Dimanche" zbuloi këtë të diel disa nga sekretet e negociatave për rinovimin e sulmuesit. Shumë peshë në këtë rinovim kishte përfshirja e Emannuel Macron, Presidentit të Republikës, Nicolas Sarkozy, ish-presidentit, dhe niveleve të larta të shoqërisë franceze, të cilët i kërkuan Mbappe të vazhdonte aventurën e tij në Paris dhe të ishte shembull për shumë fëmijë transalpinë.
"Le Journal du Dimanche" thekson se Leonardo, ish-drejtori sportiv i PSG, u shkarkua në maj sepse refuzoi t’i jepte Mbappe shumë kompetenca në planifikimin sportiv. Talenti nga Bondy e ka mohuar këtë gjë në çdo konferencë shtypi, madje atij i është dashur të përsërisë sistematikisht se nuk ka kërkuar largimin e Neymar, i cili sipas mediave franceze është futur në listën e transferimeve gjatë merkatos së verës.
Lideri aktual i Ligue 1 ka bërë gjithçka që është e mundur për ta mbajtur Mbappe në Paris. Në organikë, për shembull, ai shtoi Julien Maynard, një gazetar i TF1, i cili ka një marrëdhënie të shkëlqyer me "klanin" e lojtarëve. Po kështu, Luis Campos si drejtor sportiv, një figurë paternaliste e sulmuesit gjatë kohës së tij te Monaco. Kësisoji, pjesët e enigmës shkojnë të gjitha në të njëjtin drejtim.
Megjithatë, merkatoja e PSG, e dështuar sipas fjalëve të vetë Luis Campos në "RMC Sport", nuk ka qenë tërësisht e kënaqshme për kryeqytetasit. Në fakt, "Le Journal du Dimanche" raporton se objektivi i sheikëve nga Katari fillimisht ishte që të luanin me formacionin 4-4-2, me Lewandowski dhe Mbappé në sulm, pa Neymar, i cili ishte në shitje.
Polaku shkoi te Barça, ndërsa në kryeqytetin francez nuk zbarkuan as Bernardo Silva apo Skriniar, dy objektivat e Luis Campos. Së fundi, një tjetër çelës për vazhdimin e Mbappé te PSG është pozicionimi i tij në fushë.
Lojtari donte vetëm dy pozicione: krahun e majtë ose qendërsulmues. Në ndeshjen e tij të parë të sezonit, kundër Montpellier në gusht, Galtier donte ta vendoste në krahun e djathtë, por zemërimi i futbollistit, sipas "Le Journal du Dimanche", bëri që ai të mos luante në atë pozicion.
