Analisti Shkëlzen Gashi ka reaguar pas vendimit të Komunës së Prishtinë për lejimin e ndërtimit të xhamisë qendrore në Prishtinë, e që është paraparë të ndërtohet në afërsi të PTK-së.

Përmes një postimi në Facebook, Gashi ka thënë se është i zhgënjyer me lejen për ndërtimin e xhamisë qendrore në Prishtinë në oborrin e PTK-së, 

Ai ka renditur edhe arsyet pse është zhgënjyer nga ky vendim i komunës.

“Zhduken hapësirat e gjlebëruara në oborrin e PTK-së, që edhe ashtu janë të pakta në Prishtinë; ngulfatet edhe më shumë hapësira përreth, edhe ashtu fort e ngulfatur; çdo plan për xhami në oborrin e PTK-së nuk mund të jetë në harmoni me ndërtesat përret; zhduket parkingu i PTK-së, gjë që do të jetë problem sidomos për punëtorët e PTK-së; plani për ndërtimin e xhamisë është skandaloz, njësoj sikur edhe plani për katedralen”, ka shkruar ndër të tjerash Gashi.

Tutje, ai ka thënë se ndërtimi i xhamisë së re kudo në qendër të Prishtinës, për pa rrëzuar paraprakisht diçka të vjetër, është me pasoja të shumfishta.

Postimi i plotë i Gashit:

Jam ekstra-ultra-super i zhgënjyer me lejen për ndërtimin e Xhamisë Qendrore në Prishtinë në oborrin e PTK-së për një mori arsyesh, e këtu po i rendis disa shpejt e shpejt:

– zhduken hapësirat e gjelbëruara në oborrin e PTK-së, që edhe ashtu janë të pakta në Prishtinë;

– ngulfatet edhe më shumë hapësira përreth, edhe ashtu fort e ngulfatur;

– çdo plan për xhami në oborrin e PTK-së nuk mund të jetë në harmoni me ndërtesat përreth;

– zhduket parkingu i PTK-së, gjë që do të jetë problem sidomos për punëtorët e PTK-së;

– plani për ndërtimin e Xhamisë është skandaloz, njësoj sikur edhe plani për Katedralen;

Ndërtimi i xhamisë së re kudo në qendër të Prishtinës, për pa rrëzuar paraprakisht diçka të vjetër, është me pasoja të shumfishta. Në parim, jam kundër rrënimit të objekteve të vjetra, por meqenëse e nisi Miloševic-i me Kishën, duke uzurpuar hapësirën universitare dhe e vazhdoi Rugova me Katedralen, duke e shkatërruar ndërtesën e vjetër të gjimnazit, duhet ta mbyllim këtë çështje duke:

– rrëzuar ndërtesën e Radio Kosovës sepse përveçse e shëmtuar, Radio Kosova e shfrytëzon vetëm afërsisht 10% të hapësirës, kurse pjesa tjetër shfrytëzohet kryesisht nga biznese private; dhe

– ndërtuar Xhaminë në parcelën ku gjendet Radio Kosova sipas planit të arkitektes Zaha Hadid.

Edhe një herë: me një të shkrepne të aparatit i rrokim: kishë ortodokse–xhami–katedrale ose katedrale–xhami–kishë ortodokse, pra kahdo që ta sillësh, xhamia në mes, e kështu dëshmojmë se jemi qytet i tolerancës ndërfetare