Përzgjedhësi i Kombëtares së Anglisë, Gareth Southgate, pas barazimit të djeshëm ndaj Gjermanisë mendon se pika e fituar në ‘Allianz Arena’ kishte qenë plotësisht e merituar, transmeton Gazeta Metro.
Kombëtarja e Anglisë pas humbjes befasuese ndaj Hungarisë të dielën, arriti mbrëmë të marr një pikë mjaft të vlefshme ndaj Gjermanisë. Golin e vetëm për ‘Tre Luanët’ e realizoi sulmuesi i Tottenham Hotspur, Harry Kane, nga penalltia në minutën e 88’të.
Southgate pas ndeshjes ka thënë se skuadra e tij kishte luajtur mirë, marrë parasysh edhe faktin se kishin udhëtuar për t’u përballur me një nga Kombëtaret më të forta në botë.
”Mendoj se kemi luajtur mirë, kemi ardhur në një nga vendet më të vështira për të luajtur dhe e kemi mbajtur veten tonë mjaft mirë. Në pjesën e parë mendova se loja ishte në të mirën tonë, por ne zhgënjyem me pasimet e bëra dhe kjo duhet rregulluar,” tha Southgate.
Ndër të tjera 51-vjeçari shtoi se kundërpërgjigja e anglezëve pas golit të pranuar në minutën e 50’të kishte qenë e mrekullueshme dhe në fund me plot meritë arritën të marrin edhe një pikë.
”Përgjigja ndaj golit të pranuar ishte e jashtëzakonshme dhe ne krijuam më shumë raste të cilat ishin të mjaftueshme për të marrë barazimin dhe ishte e merituar,” theksoi ai.
‘Tre Luanët’ tani do të jenë nikoqir i Italisë më 11 qershor në ‘Molineux Stadium’, ndërsa pas tre ditësh përsëri do të presin në shtëpi Hungarinë. /gazetametro.net
