A do të qëndrojë Messi ende në Francë? Kjo është pyetja që bëhet aktualisht në Argjentinë, ku e përditshmja "Clarín" vë në pikëpyetje qëndrueshmërinë e Leos te PSG, pas eliminimit përvëlues ndaj Real Madridit në Ligën e Kampionëve.
Gazeta argjentinase beson se Messi ka provuar zhgënjimin më të madh të karrierës së tij, aq i madh sa për ta shtyrë drejt një lamtumire të hershme nga kryeqyteti francez. Kontrata i skadon në qershor 2023, por ai mund të largohet pas vetëm një sezoni.
Deri më tani, Messi ka zhgënjyer. Sigurisht që nuk ishte sezoni që ai imagjinonte mes telasheve fizike dhe hidhërimit të largimit nga Liga e Kampionëve që në 16-she. Champions-i është një obsesion historik i PSG, ndaj bëri bashkë tri yje në sulm (Messi-Neymar-Mbappe).
Nën kullën Eifel besonin se me ardhjen e kampionit argjentinas, në trident me Neymar dhe Mbappé, triumfi europian do të vinte me siguri këtë vit. Në vend të kësaj, iluzioni është kthyer në zhgënjim.
Për pasojë janë rindezur thashethemet për të ardhmen e Leos. Disfata e pësuar nga Real Madridi mund të ketë qenë goditja përfundimtare në marrëdhëniet mes Messit dhe PSG-së.
