Gazetarët e kanë pyetur kryeministrin Albin Kurti lidhur me mëditjet që i kanë marrë deputetët, duke përfshirë këtu edhe me dhjetra të partisë së tij, duke i arsyetuar se u nevojiten për naftë pasi udhëtojnë, ani pse shumica prej tyre jetojnë në Prishtinë.
Kurti në një konferencë për media u ka lënë fajin pushteteve të kaluara, si zakonisht, edhe për këtë çështje, raporton Demokracia.com.
Ky i fundit gazetarëve u tha se nuk duhet të etiketohen deputetet, derisa tentoi që të arsyetohet duke thënë se ai vet i ka ulur pagat në kabinetin qeveritar.
“Këto praktika kanë qenë të trashëguara nga kuvendet e kaluara, por këto duhet rregulluar. E kuptoj indinjatën e qytetarëve për këto shpenzime, por është i padrejtë etiketimi veç e veç i ndonjë vendimi të veçantë apo deputeteje. Vendimi është i vjetër më shumë se një dekadë. Është detyrë e secilit në vend, sidomos personave të zgjedhur, ta ruajnë kuletën e shtetit. Si ekzekutiv, ne e kemi bërë këtë. Fillimisht me vendimin për uljen e pagave për kabinetin qeveritar. Jeni dëshmitar të shpenzimeve të ulura nga Qeveria, atëherë kur janë rritur të hyrat”, ka thënë ai.
Ndërkohë, 67 deputetë të Kuvendit të Kosovës janë kompensuar për shpenzimet që kanë bërë për “karburant”, ku mbi 50 për qind e tyre janë deputetë të Lëvizjes Vetëvendosje.
Shefja e Grupit Parlamentar të LVV-së, Mimoza Kusari-Lila, ka publikuar listën me emrat e 67 deputetëve dhe shumën e parave që kanë marrë për shpenzime të udhëtimit, raporton Demokracia.com.
Lista e plotë u publikua pas publikimit të emrave të 12 deputetëve, gjashtë prej të cilëve ishin nga radhët e LVV-së dhe shumave që ata morën nga shteti për karburant.
Sipas kësaj liste, vetëm për shpenzime të rrugës të këtyre deputetëve për pjesëmarrje në seanca janë harxhuar 8 mijë e 680 euro, derisa për shpenzime të rrugës për pjesëmarrje në komisione janë harxhuar 5 mijë e 430 euro.
