Opozita i ka kërkuar transparencë kryeministrit Albin Kurti rreth përmbajtjes së draftit të statutit për Asociacionin e komunave me shumicë serbe. Përfaqësues të subjekteve në opozitë i adresuan edhe kritika për gatishmërinë e shprehur në Bruksel për pranimin e tij
Përfaqësues të partive kryesore opozitare i kanë kërkuar transparencë kryeministrit Albin Kurti për përmbajtjen e draftit të statutit për Asociacionin e komunave me shumicë serbe, të përfshirë në planin e ri evropian, që pesëshja euro-amerikane ua dorëzoi Kosovës e Serbisë më 21 tetor..
Kryetari i Lidhjes Demokratike, Lumir Abdixhiku, i ka bërë thirrje kryeministrit që këtë draft ta shpalosë në Kuvend, teksa i adresoi kritikë për gatishmërinë e shprehur në Bruksel për pranimin e tij.
“Tani, yjet politike janë përplot ironi. Ato, arkitektit të mashtrimit, dhunës e përplasjeve njëdekadëshe ndërshqiptare i përcaktojnë fatin e bërjes së Statutit të Asociacionit për serbët dhe kështu zhbërjes së kauzës jetësore të tij. Çfarë fati i trishtë politik. Fati i tillë megjithatë nuk ka fare rëndësi. Rëndësi ka të kuptojmë atë që duhej ta kuptonim një dekadë më parë”, ka shkruar Abdixhiku në Facebook.
Kritikë shprehu edhe nënkryetarja e Partisë Demokratike, Vlora Çitaku.
“Për vitet e humbura dhe mundësitë e pashfrytëzuara nga helmi i vjellë nga populizmi dhe oportunizmi i Kurtit do të flasim prapë. Tani Albin, pak transparencë për marrëveshjen dhe draftin e Asociacionit. Mos u fshih”, është shprehur Çitaku.
Tek foli në konferencën ndërkombëtare për shkencë, teknologji, biznes e Inovacion, Kurti theksoi se liderët e mëdhenj i sakrifikojnë interesat e tyre për një kauzë më të madhe.
“Ajo që e bën një lider të madh, është gatishmëria për të sakrifikuar interesin e tij/saj për një kauzë më të madhe. Me fjalë të tjera, udhëheqësit e mëdhenj janë aq të përkushtuar ndaj parimeve të tyre dhe aq të vendosur për t'i mbrojtur ato parime në mënyrën më efektive të mundshme, saqë janë të gatshëm të dëmtojnë interesat e tyre personale për ta bërë këtë”, ka deklaruar Kurti.
E ndryshe nga përfaqësuesit e tjerë opozitarë, kryetari i AAK-së, Ramush Haradinaj, ka thënë se dakordimi i Kurtit për draftin përbën një të arritur të madhe, por të vonuar për Kosovën.
“Ajo që ka ndodhë të enjten është që Kurti edhe Kosova me Amerikën e evropianët me i zbatuar ato që ka ra dakord Kosova, mos me prit Serbinë, mos me u marr me Serbinë vetëm me u marrë me amerikanët dhe ta hapin kontratën në NATO. Pra kjo na intereson neve, kontrata për NATO”, ka thënë Haradinaj.
Ai ka shtuar që megjithëse nuk e ka parë draftin, beson se ai e nënkupton një Asociacion në kuadër të Kushtetutës dhe ligjeve të Kosovës. E Kurti, një ditë më parë ka theksuar se e respekton kërkesën e emisarëve për të mos folur rreth propozimit, tek ka shtuar se drafti e përmban dispozitën që parasheh kontroll nga Gjykata Kushtetuese.
