Futbollisti i Kombëtares shqiptare të futbollit, Jasir Asani, ishte i ftuari i mbrëmjes së djeshme në emisionin “Më lër të flas” në Top Channel. Ai jo vetëm se ishte një zbulim i kësaj skuadre, por edhe një surprizë mjaft e bukur për shqiptarët.
Jasir Asani ka qenë padyshim protagonisti kryesor në ndeshjet e luajtura, duke realizuar edhe golat nga më të bukurit në Euro 2024.
Pjesë nga intervista:
Duke qenë se futbollisti është shqiptar i Shkupit, përse ka zgjedhur të jetë pjesë e kombëtares shqiptare të futbollit?
Kur kam qenë 17 vjeç, kemi qenë në përgatitje me grupin dhe unë kam qenë pjesë e Maqedonisë. Më pas, më marrin në telefon nga Federata Shqiptare e Futbollit për të qenë pjesë e ekipit. Dhe direkt erdha. Nuk e kam menduar asnjë sekondë. Unë kam pritur që të jem pjesë rreth 7 vite, edhe pse kam pasur mundësi që të jem pjesë e ekipit maqedonas.
Sa e vështirë ka qenë për Jasir Asanin që të realizonte ëndrrat e tij?
Ka qenë shumë e vështirë, sepse vetëm babi ka punuar edhe në Maqedoni nuk kanë qenë as rrogat e mira që mund të plotësonin dëshirën e të gjithëve në familje. Kanë qenë shumë vështirësi në atë kohë, sepse nuk kisha as këpucë. Babi ka bërë çdo gjë që ka mundur. Thjesht babi më ka thënë ‘Mos u dorëzo asnjëherë’.
Pas performancës së tij të shkëlqyer në kualifikueset e Euro 2024, a ka ndonjë marrëveshje për të kaluar në Europë?
Marrëveshjet nuk është se janë të përfunduara, por janë 6-7 ekipe. Janë shumë ekipe të mira. Janë në Gjermani, Itali, Spanjë e Saudi.
Jasir dha edhe një mesazh për kombëtarët dhe të gjithë njerëzit që e kanë ndjekur në rrugëtimin e tij:
Unë edhe në fushë, edhe jashtë fushe, jam shumë krenar që luaj për ekipin kombëtar dhe do të jem deri në vdekje. Deri në frymën e fundit. Dhe do bëj çmos për çdo tifoz që të shkojmë në europian.
