Mbrëmjen e djeshme kryeministri grek Kyriakos Mitsotakis mblodhi në një darkë informale në Athinë liderët e Ballkanit Perëndimor, të vendeve të tjera të rajonit që janë në BE, por edhe shefat e unionit. Shqipëria bojkotoi pas kursit të përplasjeve për Fredi Belerin.
Gazeta greke “Kathimerini” shkruan se Mitsotakis i çoi mbrëmë një mesazh të qartë Edi Ramës.
“Qëllimi i është mesazhi i rëndësishëm i faktit që nuk u ftua kryeministri shqiptar Edi Rama në darkë. Mesazhi nuk i drejtohej vetëm Tiranës, por shkoi në të gjitha drejtimet dhe thoshte se Greqia nuk do të tolerojë asnjë lëvizje që ose cenon interesat e saj ose nuk është në përputhje me standardet evropiane. Qëndrimi i Athinës ka qenë prej kohësh i qartë dhe thotë se qeveria shqiptare ka tejkaluar kufirin me çështjen Beleri” thuhet në shkrim.
Gazeta tjetër greke, “iefimerida” citon një zyrtar të lartë europian për çështjen Beleri, që sipas saj theksoi në kushte anonimati se “çelësi” është zgjidhja e mosmarrëveshjeve dypalëshe për integrimin në BE.
“Zgjidhja e mosmarrëveshjeve dypalëshe me vendet kandidate në BE është e një rëndësie parësore, veçanërisht mosmarrëveshjet lidhur me të drejtat e pakicave, vuri në dukje një zyrtar i lartë evropian pas darkës së udhëheqësve në Athinë” shkruan gazeta.
Ndërkohë pas përfundimit të darkës jo zyrtare, detaje të tjera kanë dalë në lidhje me takimin e liderëve të Ballkanit Perëndimor që u zhvillua në Athinë, me ftesë të kryeministrit Kyriakos Mitsotakis.
11 liderët pjesëmarrës në këtë takim, përfshirë këtu kryeministrin Mitsotakis nënshkruan një deklaratë të përbashkët me 8 pika, ku mes të tjerash u shpreh mbështetja e palëkundur për pavarësinë, sovranitetin dhe integritetin territorial të Ukrainës brenda kufijve të saj të njohur ndërkombëtarisht.
Një nga pikat më të rëndësishme të kësaj deklarate ishte dhe procesi i zgjerimit, i cili në këto momente të luftës në Ukrainë, tregoi edhe njëherë rëndësinë e përfshirjes së Ballkanit Perëndimor në familjen europiane./Pamfleti
