Pas disa përplasjeve dhe ironive mes njëri-tjetit muajt e fundit, duket se përballja e radhës mes Albin Kurtit dhe Edi Ramës do të jetë në Slloveni.
Të dy kryeministrat, Rama dhe Kurti kanë konfirmuar praninë e tyre si folës në forumin dy ditor që do të mbahet në Bled të Sllovenisë më 28 dhe 29 Gusht.
Ky forum do të jetë një mundësi për një takim që zvarritet kohët e fundit mes Ramës dhe homologut te tij Albin Kurti.
Më 6 Korrik kur Rama vizitoi Prishtinën, si pjesë e turit të tij ballkanik kushtuar përgatitjeve për takimin e Tetorit në Tiranë në kuadër të Procesit të Berlinit, ai u prit vetëm nga Presidentja Osmani dhe nga kryeparlamentari Konjufca.
Kurti asokohe nuk pranoi takime me Ramën dhe e konsideroi si të paarsyeshëm vendimin e kryeministrit shqiptar për të anuluar mbledhjen e dy qeverive që ishte parashikuar të mbahej më 14 Qershor në Gjakovë.
Ai u shpreh se do të mirëpriste Ramën që të zhvillonin mbledhjen nderqeveritare ku të firmosnin 13 marrëveshjet e përbashkëta për të cilat ishin dakordësuar më parë.
Më 17 Korrik, Kurti e refuzoi për herë të dytë takimin me Ramën teksa kryeministri mblodhi në një takim informal krerët e Ballkanit Perëndimor në Tiranë. Kurti preferoi atë ditë të shfaqej në një simpozum të një shoqate jo qeveritare në ishullin e Kretës.
Qejfmbetjet e kryeministrit kosovar ndërlidhen me faktin se Kryeministri Rama adresoi kritika publike ndaj qeverisë në Prishtinë për mosmenaxhimin si duhet të situatës me serbët në veri pas zgjedhjeve të parakohshme në katër komunat serbe që sollën ndërprerjen e dialogut me Beogradin dhe më pas sanksione nga BE e SHBA.
Po ashtu Kurti u gjend i befasuar nga drafti për themelimin e bashkësisë së komunave serbe që Rama e dërgoi në Berlin e Paris pa e konsultuar atë paraprakisht. Kryeministri kosovar ka ironizuar edhe iniciativën rajonale të Ballkanit të Hapur në të cilën Rama ka arritur marrëveshje bashkëpunimi me Vuçiq e Kovaçevski për projekte të përbashkëta kryesisht ekonomike.
Kurti ka realizuar kohët e fundit disa takime në selinë e qeverisë kosovare në një mjedis të hapur që e ka emërtuar publikisht si Ballkoni i Hapur në një karshillëk të hapur me iniciativën rajonale që ka për iniciator edhe Kryeministrin shqiptar.
Në forumin strategjik të Bled-it do të marrin pjesë krahas Kryeministrave Rama e Kurti edhe Presidenti serb Vuçiç, Kryeministri maqedonas Kovaçevski si dhe Presidenti i Këshillit Evropian Charles Michel. Aty do të flitet krahas bashkëpunimit rajonal edhe për çështjet e sigurisë dhe anëtarësimin në BE.
