Në Angli, dihet, argjentinasit nuk është se pëlqehen shumë. Është kështu që kur Pibe de Oro, Diego Armando Maradona shënoi golin e famshëm me dorë në 1986. ‘Dora e Zotit’ është parë gjithnjë si mashtrim nga anglezët, që tani janë vërsulur kundër Emiliano Martinez, portierit të Argjentinës.
Sigurisht numri 1 i Aston Villa bëri gjithçka për ta përfshirë veten në stuhinë e sulmeve e kritikave. I fundit në radhë ka qenë Graeme Souness, ish-lojtari i Liverpool, që e quajti një klloun.
Mes kritikave të shumta që kanë rënë mbi Emiliano “Dibu” Martinez, për sjelljen e tij në Kupën e Botës, ka ardhur edhe ajo nga Graeme Souness. Legjenda e futbollit skocez nuk ka lënë gjë pa thënë për portierin argjentinas.
“Pjesa më e madhe e debatit pas Kupës së Botës është përqendruar në sjelljen e tij gjatë goditjes së penalltive. Unë mund t’i pranoj ato karagjozllëqe, deri në një pikë. Por ajo që duhet të flasim më shumë është gjesti i turpshëm që ai bëri pasi tërhoqi trofeun për portierin më të mirë të turneut. A ka vërtetë njerëz që kënaqen duke parë diçka të tillë? Martinez turpëroi veten dhe vendin e tij. Ai dukej si një klloun vulgar”, tha ai.
