Lionel Messi e Julian Alvarez kanë shkëlqyer në fitoren e thellë dhe të lehtë të Argjentinës ndaj Kroacisë. Të martën mbrëma, Argjentina fitoi 3:0 ndaj Kroacisë për t’u bërë finalistja e parë e Kupës së Botës në Katar.
Të dielën në finale, Argjentina takohet me fituesin e ndeshjes Franca – Maroku. Ndërkohë Kroacia të shtunën luan për vendin e tretë.
Superylli Lionel Messi ka realizuar penallti në minutën e 34-t për rezultatin 1:0. Ai goditi fuqishëm dhe saktë nga pika e bardhë. Ishte goli i 11-të i Messit në Kupën e Botës dhe kështu është bërë golashënuesi më i mirë i Argjentinës në histori të Botërorëve. Për Messin ishte ndeshja e 25-të dhe ai është barazuar me ikonën gjermane, Lothar Matthaeus sa i takon paraqitjeve në Botëror. Tani Messi ndan rekordin me gjermanin e famshëm.
Julian Alvarez është ende në fillim të karrierës, por ka shfaqur tjetër ndeshje të madhe. Pos që nxori penalltinë e konkretizuar nga Messi, 22-vjeçari shënoi dy golat e tjerë.
Pasi mori top nga Messi thuajse në gjysmën e fushës, Alvarez në minutën e 39-të dribloi disa lojtarë të Kroacisë për të konkretizuar me gol kundërsulmin.
Me 2:0 përfundoi pjesa e parë.
Kroatët u munduan të reagojnë në fillim të pjesës së dytë, por pa shumë sukses. Në minutën e 69-të, Messi pati tjetër moment magjie. E kaloi disa herë mbrojtësin më të mirë të Kroacisë, Joshko Gvardiol, pas një shpërthimi në krah. Dhe bëri pasim mjeshtëror për Alvarezin që shtyu topin në rrjetë për 3:0.
Më pas argjentinasit ulën ritmin, ndërsa kroatët sikur u pajtuan me disfatën. Dhe gola të tjerë nuk u shënuan.
Messi ka paralajmëruar se ky është Botërori i fundit për të. Ai po bën përpjekje maksimale për ta fituar Kupën e Botës, trofeun e vetëm që i mungon. Messi ka shkëlqyer në Katar deri më tani, ndërsa do ta udhëheqë Argjentinën edhe në finale, me synim që në fund ta ngrejë trofeun lartë.
