Rikthehet në vëmendje tragjedia e 9 janarit 2004 ku humbën jetën 28 shqiptarë në tentativë për të kaluar me gomone drejt Italisë.
Disa familjarë të viktimave, janë paraqitur sot përpara ambienteve të Prokurorisë së Posaçme kundër Korrupsionit dhe Krimit të Organizuar (SPAK) në formë proteste.
Sipas Neës24, dosja e kësaj çështje është dërguar në Prokurorinë e Vlorës për moskompetencë, çka ka sjellë dhe reagimin e familjarëve të cilët nuk duan që ajo të hetohet aty.
Ata shprehen se fajtor për vrasjen e 28 personave është shteti dhe ata që janë të veshur me pushtet.
Gjithashtu familjarët kanë bërë thirrje për vendosjen e drejtësisë dhe dënimin e përgjegjësve për këtë tragjedi.
“Ne jemi përfaqësues të shoqatës 9 Janari, unë jam kryetari. përfaqësojmë shoqatën e 30 familjeve, ku na kanë vdekur 30 fëmijët tanë afër bregut në Vlorë. Ata njerëz kanë qenë një grup i strukturuar kriminal, që përbëhet nga policia e Vlorës. Josif Shtëmbari e ka bërë analizën e asaj policie dhe e ka cilësuar ata 30 oficerë, si pjesëtarë të bandës. Ata i morën prej Shkodrës. E ndaluan gomonen në mes të detit dhe kanë gjuajtur me armë. Ne kërkojmë zbardhjen e çështjes. Kërkojmë hapjen e çështjes, Prokuroria e Vlorës është e korruptuar, se nuk janë hetuar ata që kanë bërë krimin. Është e vetmja tragjedi për arsye se nuk është dhënë ndihma. është njoftuar shteti dhe kanë thënë; po vdesim këtu dhe nuk u bë operacioni i kërkim-shpëtimit për të shpëtuar ata njerëz. I lanë atje për t’u fundosur. Pas 18 orësh ka nisur kontrollet anija italiane. Ne na e mbyllën çështjen që mos të dilte ky grup kriminal. Ne i kërkojmë SPAK zbardhjen e çështjes, të vihen para drejtësisë kriminelët që na kanë vrarë fëmijët. I lanë 17 orë 13 km afër bregut. Ne kemi 8 vetë të zhdukur. Si kemi gjetur ende. Ja ky burrë këtu nuk e ka gjetur djalin e vetëm, si ka një varrë.”, tha Nikollë Mehillaj, kryetar i shoqatës së viktimave.
