Greqia nuk po ndryshon qëndrim dhe nuk do ta njohë Kosovën, thotë ambasadori grek Giorgos Giakofotakis dhe thekson se nuk ka presion ndaj Greqisë për ta bërë këtë.
Kohë më parë, Ministri i Punëve të Jashtme, Nikos Dendias, me rastin e rritjes së aktiviteteve diplomatike të Kosovës në bisedimet me zyrtarët grekë për njohjen e Kosovës, tha se Athina mban marrëdhënie të mira me autoritetet në Prishtinë, veçanërisht në fushën e ekonomisë dhe tregtisë si dhe që bashkëpunon në kuadër të organizatave rajonale në Evropën Juglindore.
“Gjatë vizitës së tij të fundit në Beograd (3 qershor), Ministri i Punëve të Jashtme Nikos Dendias përsëriti se qëndrimi i Greqisë mbetet i pandryshuar dhe se ajo nuk ka ndërmend të njohë pavarësinë e Kosovës”, tha ambasadori, duke iu përgjigjur në një intervistë me shkrim për Tanjug pyetjes nëse pritshmëritë e Prishtinës ndaj Greqisë do të jenë të parat nga pesë anëtarët e mbetur të BE-së që do ta njohin Kosovën./FrontOnline/
