Shefi i EULEX-it në Kosovë, Lars-Gunnar Wigemark, ka reaguar pasi Policia kufitare është sulmuar me armë zjarri të shtunën në Liqenin e Ujmanit në Zubin Potok.
Shefi i EULEX-it, Lars Gunnar-Wigemark, ka dënuar sulmet ndaj Policisë së Kosovës në veri, duke thënë se këto sulme janë akte kriminale dhe duhet të ndalen menjëherë.
Po ashtu, Wigemark ka deklaruar se EULEX-i do t’i shtojë patrullimet në atë zonë.
Këtë deklaratë ai e ka bërë të ditur në rrjetin social Twitter.
“Të shtënat në liqenin e Gazivodës – Ujmanit janë edhe një sulm me zjarr ndaj Policisë së Kosovës. Askush nuk u lëndua, por këto sulme jo vetëm që janë të rrezikshme, janë edhe veprime kriminale dhe duhet të ndalojnë menjëherë. EULEX-i do të rrisë patrullat në atë pjesë”, thuhet në postimin e kreut të EULEX-it.
Lidhur me rastin ka reaguar edhe kryeministri i Kosovës, Albin Kurti, i cili ka thënë se sulmi është duke u hetuar.
Ai ka bërë të ditur se njësia policore e Stacionit Policor për Mbikëqyrjen e Kufirit (SPMK) në Zubin Potok, është qëlluar rreth 10 herë sot, derisa po bëheshin gati për një kontrollë rutinore me barkë në Liqenin e Ujmanit.
“Kjo është hera e dytë në më pak se një javë që Policia e Kosovës sulmohet nga bandat kriminale në pjesën veriore të territorit tonë, vetëm gjashtë ditë pas incidenteve të së dielës”, ka shkruar kreu i shtetit në Twitter.
“Fatmirësisht, shpëtuam pa viktima dhe tani po zhvillohet një hetim i plotë për këtë rast. Sot, në rrugë nuk ka barrikada”, ka shtuar Kurti.
Gjithashtu, edhe ministri i Punëve të Brendshme, Xhelal Sveçla, ka reaguar për sulmin e ndodhur të shtunën, ndaj policisë së Kosovës në Liqenin e Ujmanit në Zubin Potok.
Sipas tij, grupet ilegale serbe kanë shtënë drejt zyrtarëve policorë për t’i penguar ose për t’i vrarë ata.
Ndërkaq, Sveçla ka thënë se Policia e Kosovës do të mbetet e angazhuar të kryejë detyrën e tyre, dhe se për asnjë kush nuk do të tërhiqen nga e drejta e tyre pavarësisht çdo sulmi të organizuar.
