Agjencia Kundër Korrupsionit ka publikuar sot pasurinë e zyrtarëve publikë të Kosovës.
Në kuadër të deklarimit të pasurisë theksohet se vetëm 14 zyrtarë nuk e kanë deklaruar atë.
E presidentja e vendit, Osmani në deklarim të pasurisë ka edhe një banesë të papërfunduar me garazh, në një sipërfaqe prej 95 metra katrorë, vlera e së cilës arrin në 42 mijë e 500 euro.
Përpos kësaj, Osmani ka deklaruar se posedon 35 mijë e 721 euro, si dhe 6 mijë e 774 dollarë para të gatshme të mbajtura në bankën Raiffeisen.
Vjosa Osmani ka deklaruar edhe shtëpinë e shumë komentuar në lagjen Marigona, e cila kap vlerën e 87 mijë e 900 euro, e cila thuhet se është në pronësi të përbashkët me bashkëshortin e saj, por tek “Qëllimi i detyrimit”, thuhet se është borxh.
Në kuadër të deklarimit të të hyrave vjetore, tek paga e presidentes Osmani vlera e pagës vjetore arrin në 32 mijë e 922 euro.
Po ashtu Osmani ka 6 mijë e 223 euro i ka marrë nga mëditjet në udhëtimet gjatë 2021-ës.
Kurse bashkëshorti i saj, Prindon Sadriu merr pagë vjetore prej 37 mijë e 885 euro nga buxheti i Kosovës dhe 8 mijë e 500 euro nga qiratë.
