Dënohet me vdekje një burrë që vrau një prift me thikë në Egjipt.
Nehru Tawfiq, 60 vjeç, u dënua në gjykatën penale të Aleksandrisë për vrasjen e priftit 56-vjeçar Arsanious Wadid dhe posedim të paligjshëm të një thike. Avokatët e tij kishin argumentuar se vrasja nuk ishte e qëllimshme. Wadid u vra në një shëtitore të njohur bregdetare në qytetin mesdhetar të Aleksandrisë në prill.
Hetuesit zbuluan se Tawfiq ishte një islamist me prejardhje ekstremiste. Gjatë seancës gjyqësore të muajit të kaluar, ai u paraqit në gjykatë në një pjesë të mbyllur të dhomës duke thirrur "Zoti është i madh" në arabisht.
Ai u përpoq të recitonte vargje nga Kurani, libri i shenjtë mysliman, përpara se gjykatësit ta urdhëronin të heshtte. Sulmi shënoi dhunën e fundit sektar në Egjipt.
Ekstremistët islamikë kanë shënjestruar vazhdimisht të krishterët në vitet e fundit, veçanërisht pas përmbysjes ushtarake të presidentit Mohammed Morsi, në vitin 2013.
Në shtator 2017, një mbështetës i dyshuar i grupit të Shtetit Islamik goditi me thikë një mjek të krishterë 82-vjeçar në Kajro. Ai u dënua me vdekje.
Koptët egjiptianë komuniteti më i madh i krishterë në Lindjen e Mesme – përbëjnë rreth 10 për qind të 103 milionë banorëve të vendit dhe vazhdimisht ankohen për diskriminim nga shumica myslimane.REL
