Vetëm sot ka ndodhur dy raste të përleshjeve mes nxënësve të dy shkollave fillore në vendin tonë. Për njërin rast Sinjali ka raportuar në mëngjes, i cili ndodhi në një shkollë në Hajvali, ku u përfshinë gjashtë nxënës. Ndërkohë burimet e Sinjalit kanë dhënë detaje për përleshjen tjetër, që ndodhi në lagjen Malësia të Kamenicës.
Sipas burimeve brenda Prokurorisë disa nxënës të një shkolle fillore janë kapur me njëri-tjetrin, pas një mosmarrëveshje verbale, që eskaloi në përdorimin e thikës. Gjatë përleshjes me grushte, njëri nga të dyshuarit kishte nxjerrë një thikë, me të cilën iu ka vërsul viktimës, por që e pësoi shoku i tij, i cili tentoi t’i ndajë.
Personi që u ther me thikë ka pësuar lëndime të rënda trupore, me ç’rast është dërguar në spital për trajtim mjekësor, ndërsa të dyshuarit janë shoqëruar në stacion policor.
Me urdhër të Prokurorit të Shtetit, njëri nga të miturit është ndaluar për 24 orë si i dyshuar për “lëndim i rëndë trupor”, teksa ndaj tjetrit do të bëhet kallëzim penal brenda afatit ligjor, për veprën penale “sulm”.
