Ambasadori i SHBA-së në Beograd, Christopher Hill, ndoqi nga afër samitin dy ditor në Ohër, ku u diskutua për “Ballkanin e Hapur”.
Në një intervistë Abcnews.al, Hill tha se ai ndodhej në Ohër pikërisht për të mbështetur projektin për “Ballkanin e Hapur”, pasi sipas tij ky është një projekt origjinal bashkëpunimi mes vendeve të rajonit.
“Jam këtu për ta mbështetur këtë projekt, pasi besoj se ‘Ballkani i Hapur’ është një projekt origjinal bashkëpunimi dhe mjaft i vlefshëm për vendet përkatëse”, deklaroi ambasadori i SHBA-së në Beograd.
I pyetur lidhur me deklaratat e bëra nga minsitri i Jashtëm rus, Sergei Lavrov, se “Ballkani i Hapur, është një nismë serbe dhe se ai e mbështet atë, Hill tha se kjo është një deklaratë sarkastike dhe dashakeqe.
Sipas tij Lavrov nuk është një mbështetës i “Ballkanit të Hapur”, ndaj deklarata e tij shpreh vullnet negativ.
“Nuk mendoj se ai mbështet ‘Ballkanin e Hapur’, madje mendoj se deklarata e tij për ta mbështetur “Ballkanin e Hapur” ishte sarkastike dhe me vullnet negativ. Kështu që nuk besoj se ai është një mbështetës i ‘Ballkanit të Hapur’, u shpreh ambasadori Hill.
Lidhur me deklaratat e ministrit të Jashtëm rus se ky shtet është në përkrahje të “Ballkanit të Hapur”, kryeministri i Shqipërisë, Edi Rama tha se nëse kjo do të ishte e vërtetë Sergei Lavrov do të ishte sot në samitin e Ohrit. Presidenti i Serbisë, Aleksandar Vuçiq, tha se ideja për “Ballkanin e Hapur” nuk ka qenë jashtë rajonit.
Videon me deklaratën e ambasadorit Hill mund ta ndiqni KËTU
