Kurt Zouma po ndiqet penalisht pasi pamjet video të 27-vjeçarit duke abuzuar me macen e tij u bënë “virale” në rrjetet sociale në shkurt.
Vëllai i tij më i vogël (lojtar i Dagenham), Yoan, e filmoi Zouma duke shkelmuar dhe goditur një nga macet e tyre të shtëpisë, gjë që tronditi publikun. Ylli i “Hammers” do të paraqitet në “Barkingside Magistrates” më 24 maj për seancën dëgjimore.
Zouma do të ëndërrojë të arrijë në finalen e “Europa League”, të mërkurën e 18 majit në Seville dhe data e afërt e gjyqit mund të shkaktojë një shpërqendrim për fundin e sezonit.
West Ham do të përballet me një provë të vështirë kundër skuadrës së Bundesligës, Eintracht Frankfurt në gjysmëfinale të kompeticionit, pasi gjermanët më parë eliminuan Barcelonën.
Skuadra angleze do të jetë pa qendërmbrojtësin Zouma në gjysmëfinalen e parë, me francezin aktualisht jashtë fushës për një dëmtim në kyçin e këmbës.
“Hammers” do të merrnin pjesë në finalen e tyre të parë evropiane që nga viti 1976, nëse mundin edhe Eintracht Frankfurt, me Rangers ose RB Leipzig që i pret.
Zouma, i cili iu bashkua West Ham-it nga Chelsea në gusht 2021 për 29.8 milionë £, u akuzua nga RSPCA muajin e kaluar sipas “Aktit të Mirëqenies së Kafshëve”.
Që atëherë, të dyja macet e tij janë marrë nën kujdes. Pas shfaqjes së pamjeve, lojtari pohoi se i vinte shumë keq, gjë që ngjalli vëmendje të madhe.
West Ham më pas e gjobiti Zouma me 250.000 £, ndërsa sponsorët e këpucëve “Adidas” anuluan kontratën e tyre me lojtarin. Megjithatë, trajneri David Moyes nuk hoqi dorë prej tij.
Kjo bëri që tifozët të tundnin pankarta kundër qendërmbrojtësit në stadium, sepse ishin kundër pranisë së tij të vazhdueshme në ekip. Tashmë do të ketë punë me gjykatën, ndërsa ligji anglez për kësi rastesh parashikon gjobë dhe burgim deri në 5 vite.
