Pse Kosova po e mbështetë Ukrainën, kur ajo s’e njeh si shtet?
Përmes një interviste për Associated Press, kryeministri i Kosovës, Albin Kurti ka folur për situatën e sigurisë në Kosovë dhe Ballkan, pas shpërthimit të luftës në Ukrainë. Sipas Kurtit, Vladimir Putin po kërkon ridefinimin e pozicioneve dhe kompensimin nga Perëndimi për shpërbërjen e bllokut sovjetik.
Ai ka deklaruar se Putin nuk kërkon që të ulët në tavolinën e negociatave me presidentin ukrainas, Volodymyr Zelensky, por me presidentin amerikan, Joe Biden. Gjatë intervistës, Kurti është pyetur edhe për mbështetjen e fuqishme të Ukrainës nga Kosova, ndonëse Ukraina nuk e ka njohur pavarësinë e Kosovës.
“Por nga buron ky solidarizim me një vend që s’e ka njohur Kosovën?”- i pyetur rreth kësaj çështje, Kurti tha se kosovarët gjejnë ngjashmëri të shumta në situatën e sotshme të ukrainasve, sepse para një çerek shekulli vetë Kosova ndodhej në një pozicion të tillë.
“Tek lufta mbrojtëse dhe çlirimtare e popullit të Ukrainës, ne gjejmë shumë ngjashmëri me situatën tonë para një çerek shekulli, kur një fqinj shumë më i madh verior dëshiron të të okupojë, të të shtypë, të të shfrytëzojë, të të diskriminojë, të krijojë aparteid dhe gjithashtu provon edhe gjenocidin, i cili në Kosovë u nis, por u ndalua nga intervenimi i NATO-s, që të mos kishim shfarosje të shqiptarëve në vendin tonë”, ka thënë Kurti për agjencinë e lajmeve Associated Press, raporton Gazeta Express.
