Edhe pas dy dekadash që ka mbaruar lufta në Kosovë, kryeqyteti i Kosovës, Prishtina, është pa shtatoren e komandantit legjendar të UÇK’së, Adem Jashari, por siç duket së shpejti do të ndërtohet pasi sot ju janë dorëzuar kryetarit të Prishtinës, Përparim Ramës, procedurat për realizimin e projektit, transmeton Gazeta Metro.
Shefi i Grupit Parlamentar të Asamblistëve të PDK’së në Prishtinë, Leotrim Retkoceri, i ka dorëzuar kryetarit të ri të Prishtinës, Përparim Rama, propozimin për nisjen e procedurave për realizimin e projektit të shtatores së Komandantit legjendar, Adem Jashari në Prishtinë.
Retkoceri përmes një njoftimi në Facebook, ka deklaruar se: ”Ka më shumë se dy dekada që në Prishtinë mungon shtatorja e komandatit legjendar, Adem Jashari. Duke dashur që kësaj pritje t’i japim fund, Grupi i Asambleistëve të PDK-së në koordinim me nënkryetaren Donjeta Sahatçiu ka marrë iniciativë për ta përshpejtuar këtë projekt kombëtar. Pritjes së madhe po i vjen fundi. Bac, Prishtina të pret!.”
Propozimin e PDK’së për këtë projekt po e mbështetë edhe partneri i koalicionit në kryeqytet, LDK’ja. /gazetametro.net
