Pasuria e Burim Rrecit, i cili sot u kap nga autoritetet e Malit të Zi nën dyshimin se po transportonte 50 kilogramë marihuanë, nuk është e vogël.
Ai i ka në pronësi disa banesa, lokal afarist, garazh për vetura dhe një veturë të shtrenjtë, shkruan Demokracia.com.
Rreci, që mbante pozitën e Sekretarit të Përgjithshëm të Ministrisë së Tregtisë dhe Industrisë deri në vitin 2019, kur edhe u shkarkua nga ish-ministri Vesel Krasniqi, ka katër banesa, një veturë të deklaruar në emër të bashkëshortes në vlerë të 10 mijë eurove, një lokal të përbashkët në vlerë prej 350 mijë euro dhe një garazh për vetura të përbashkëta në vlerë të 40 mijë eurove. Këtë pasuri, Rreci e ka të deklaruar në Agjencinë Kundër Korrupsion në vitin 2019.
Rreci i kishte deklaruar në bankë edhe 900 euro para të gatshme.
Ndryshe, Demokracia.com është mediumi i parë që ka raportuar ekskluzivisht për arrestimin e Rrecit në Mal të Zi.
