Lëvizje të menjëhershme te Lazio, duke qenë se klubi bardhekaltër po përballet me një merkato të komplikuar dimërore për shkak të vështirësive me sistemimin e lojtarëve të tepërt. Njëri prej tyre është Vedat Muriqi, tashmë me valixhe në dorë.
Sipas raportimeve të “Sky Sport”, sulmuesi kosovar do të luajë në La Liga me fanellën e Mallorca në vazhdim. Transferimi i bomberit dardan bazohet te huazimi 6-mujor, me të drejtë blerjeje për 12 milionë euro.
Për Muriqin mund të jetë një mundësi shpagimi, pas një viti e gjysmë te Lazio, ku përjetoi më shumë hije se dritë. I ardhur në verën e vitit 2020 nga Fenerbahce për 20 milionë euro, sulmuesi kosovar zhgënjeu edhe “shkesin” e vet, Igli Taren.
Ai nuk i përmbushi pritshmëritë, duke shënuar vetëm 2 gola në 49 ndeshje me kryeqytetasit italianë. Prania e Immobile ia kufizoi në masë të madhe kohën e lojës, por edhe kur u vu në dyshim sulmuesi italian, kosovari nuk ishte kurrë gati për ta marrë me forcë “stafetën”.
I takon Muriqit tani që të dëshmojë vlerën e tij, duke ndihmuar një ekip pak mbi zonën e rënies nga kategoria (La Liga), në elitën e futbollit spanjoll.
