Faqja e specializuar për vlerat e futbollistëve në merkato “Transfermarkt” është një nga më të konsultuarat në internet. Kjo lidhet me detyrat e menaxherëve, trajnerëve, gazetarëve që kanë të bëjnë me nënshkrimet apo vlerën e futbollistëve.
Po kështu, ajo ngërthen edhe inatin e disa protagonistëve të futbollit vetëm për faj të vlerësimeve të tyre në treg. Një nga rastet më famëkeqe, i bërë publik nga vetë faqja në fjalë, ishte bllokimi i llogarisë së saj në Instagram nga Cristiano Ronaldo.
Pasi përpiloi një top-formacion me lojtarët me vlerën më të lartë të tregut, të përfaqësuar nga menaxheri i njohur Jorge Mendes, llogaria e vetë “Transfermarkt” shkroi një mesazh të dytë duke thënë: "Ne nuk mund ta etiketojmë Cristianon, sepse na ka bllokuar pasi ka parë vlerën e tij në treg".
Tani, ata që janë përgjegjës për faqen e internetit flasin për “The Athletic”, duke shpjeguar përplasjen me yllin portugez. "Ne vendosëm një listë në Instagram me 10 lojtarë, të gjithë 33 vjeç e lart, dhe Cristiano ishte në vendin e parë. Megjithatë, ai tha se duhet të vlejë shumë më tepër.
Së pari u dërgoi një mesazh kolegëve tanë në rrjetet sociale, – thotë Christian Swartz, i cili vazhdon: – Ata iu përgjigjën, i shpjeguan pse e kishte atë vlerë dhe i thanë: Nga njerëzit e të njëjtës grupmoshë, ti je më shumë i vlerësuari, numri një.
Përgjigja nuk do ta kënaqte Cristiano, sepse reagoi me disa fytyra (emoji) pastaj “block”. Sipas Swartz “kishte një diferencë prej 30 apo 50 milionë euro mes tij dhe të radhës në listë, por Ronaldo na dërgoi disa fytyra të buzëqeshura dhe bllokoi”.
