I mbetur pa përfaqësim politik, Sali Berisha po vërdalliset të “peshkojë” ndonjë që mjafton të ketë vulë e logo, për të futur lëvizjen “Foltore” në zgjedhjet e pjesëshme lokale kundër PD-së, si hakmarrje ndaj Lulzim Bashës e karshillëk ndaj SHBA; por siç duket përballë mesazheve të Ambasadores Yuri Kim, nuk t’i ofrojë aleancë as miku i tij Fatmir Mediu me Partinë Republikane, për shkak se ai është përballë drejtësisë për Gërdecin e Shkëlzenit.
Përballë faktit që KQZ, nuk mund ta regjistrojë grupin “Foltore” si PD në zgjedhjet e 6 marsit, pasi nuk është njohur me vendim gjykate, kryetari i kësaj levizjeje Sali Berisha po “lëviz gurët”, për të marrë pjesë me kandidatët e tij në 6 bashki.
Por të arritur këtë synim, në këtë moment krize për të, personit “non grata” i duhet një parti me vulë dhe vetëm me kryetar, sa për efekt pjesëmarrje në zgjedhje brenda logos së saj.
Sepse pjesëmarrja në votimet e 6 bashkive Shkodër, Durrës, Dibër, Lushnje, Vorë e Rrogozhinë, është kreditim moral për Sali Berishën, prandaj u është qepur partive të vogla pa dallim ngjyrash, që ta pranojnë si palë koalicioni publik qoftë dhe formal.
Këtë e kanë deklaruar në media përfaqësues të “Foltores”, të cilët pranojnë, se përballë faktit që nuk kanë mandat e vulë ligjore si PD zyrtare, po negociojnë për të paraqitur kandidatë me logo të partive të tjera.
Përveç Ilir Metës së LSI-së me të cilin është “mish e thua”, kreu i “Foltore”-s Sali Berisha, ka kontaktuar me kryetarët e 18 partive të vogla, konkretisht të Partisë Republikane, Frymës së Re Demokrate, Partisë Agrare, Partisë Çame, Partisë Demokristiane, Bindja Demokratike, Partisë Konservatore, Partisë për të Drejtat e Njeriut, Partisë Ora e Shqipërisë, “Omonia”, “Mega”etj.
Të gjithëve, personi “non grata” u ka kërkuar të pranojnë nën siglën e partive të tyre, 2-3 kandidatë të “Foltores” për kryetar të bashkive në votimet e 6 marsit, ose të krijojnë koalicion me kandidatë të përbashkët, si front kundër kandidatëve të PS e PD.
Sipas informacionit që ka “Pamfleti”, asnjë nga kryetarët e 18 partive të vogla, nuk e ka pranuar akoma bashkëpunimin dhe bashkimin në aleancë me Sali Berishën; jo se kanë fuqi të dalin e fitojnë vetëm në zgjedhje, por sepse nga bashkimi me “Foltore”-n humbasin dhe atë pak emër që kanë.
Psh, Fatmir Mediu, Agron Duka, Vangjel Dule, Sali Shehu, Kujtim Gjuzi etj., kanë deklaruar se janë në një front kundër regjimit të PS e Edi Ramës, por nuk janë deklaruar kundër PD e Lulzim Bashës dhe as për bashkëpunim me “Foltore”-n e Sali Berishës.
Është e kuptueshme, që Sali Berisha i do partitë e vogla si dekor publik, tani kur i është hequr dhe fuqia mbi PD-në, mirëpo kryetarët e tyre i kanë kuptuar mesazhet e SHBA, se ata që mbështesin apo bëhen palë me Berishën, konsiderohen kundërshtarë të politikës amerikane.
Siç duket, përballë mesazheve të DASH e Ambasadores Yuri Kim, Sali Berishën nuk ta pranojë në aleancë as miku i tij Fatmir Mediu me Partinë Republikane, për shkak se dhe ky është përballë drejtësisë për Gërdecin e Shkëlzenit e Mihal Delijorgjit.
Prandaj, afati deri më 31 janar për regjistrimin e partive në KQZ dhe mos pranimi “Foltore”-s nga partitë e vogla, ka alarmuar e ka futur në panik të madh Sali Berishën, sepse qëndrimi jashtë zgjedhjeve të 6 marsit është faliment i plotë politik për të.
Por personi “non grata”, vazhdon vërdalliset me premtime e financime, për të “peshkuar” ndonjë parti të vogël me vulë e logo ligjore, për të përfshirë lëvizjen “Foltore” në zgjedhjet e 6 marsit kundër PD-së, si hakmarrje ndaj Lulzim Bashës e si karshillëk ndaj SHBA./Pamfleti
METROPOL MAGAZINE
