Gresa, një nga banoret më të pëlqyera të Big Brother VIP Kosova, u eliminua mbrëmjen e kaluar (e premte) dhe nuk mundi të sigurojë një vend si finaliste.
Ajo u përball me një vendim të papritur, duke u larguar nga shtëpia përkrah Leonit dhe Drenushes. Ndërkohë që finaliste të siguruar ishin Xheneta, Sara, Vullneti, Xuxi dhe Driloni.
Pas eliminimit, Gresa reagoi në llogarinë e saj në Instagram, duke falënderuar publikun për mbështetjen dhe dashurinë që i kanë ofruar gjatë gjithë kohës që ka qenë pjesë e shtëpisë. Ajo theksoi se ndodhej tashmë në shtëpinë e saj në Ferizaj dhe ishte shumë e lumtur për të gjithë mesazhet pozitive që kishte marrë nga ndjekësit e saj.
“Pershendetje publiku ma i miri në botë. Jam në shtëpinë time në Ferizaj dhe jam shumë e lumtur. Faleminderit për krejt mesazhet e mira, për krejt dashurinë e madhe që ma keni ofruar. Nuk e kam besuar as vete që kam marrë kaq shumë mesazhe të mira për ju”, tha Gresa në videon e postuar.
Ajo nuk e fshehu zhgënjimin për eliminimin e saj dhe theksoi se ishte një vendim i padrejtë, duke shtuar se e meritonte të ishte pjesë e finales.
“Është e vërtetë që dola padrejtësisht nga ajo shtëpi, është e vërtetë që e meritova finalen, siç e keni thënë edhe ju. Dhe është e vërtetë që më është bërë një padrejtësi nga produksioni dhe jo nga publiku”, vazhdoi ajo. Gresa u shpreh se, megjithatë, ajo është e lumtur për dashurinë që ka marrë dhe theksoi se do të vazhdojë të ndjekë me gëzim këtë rrugëtim.
Gresa gjithashtu bëri të ditur se ishte e vetëdijshme për mënyrën se si funksionon produksioni i Big Brother dhe se kjo është pjesë e lojës. “Produksioni normalisht që i bën këto lojëra dhe do t’i bëjë gjithmonë, sepse të tillë jemi ne dhe nuk do të ndryshojmë asnjëherë”, shtoi ajo.
Përkundër reagimeve pozitive, ka pasur shumë komentet nga shikuesit, të cilët e cilësuan vendimin si të padrejtë, duke shprehur mbështetje të madhe për Gresën dhe duke e konsideruar si një nga banoret që meritonte vendin në finale.
Pavarësisht eliminimit, Gresa falënderoi fansat për mbështetje dhe u shprehu dashuri të madhe, duke u premtuar atyre se do të shihej sërish në videot e ardhshme. “Ju dua shumë”, përfundoi ajo.
