Në një intervistë shteruese me legjendën e futbollit brazilian, Romario, Neymar Jr., ylli 32-vjeçar brazilian ndau hapur mendimet mbi karrierën e tij, nga fillimet te Santosi deri te Barcelona, kalimi te PSG dhe më pas transferimi në Arabinë Saudite tek Al Hilal.
“Nuk kam pendime në karrierën time. Të gjitha gabimet që kam bërë, qoftë në karrierë apo në jetën time, ishin për të më ndihmuar të rritesha dhe të piqesha, prandaj nuk pendohem për asgjë”, – tha ylli i kombëtares braziliane, i cili ka në shënjestër Kupën e Botës 2026.
Një moment i rëndësishëm i bisedës me Romarion ishte ndalesa te zgjedhja mes Barcelonës dhe Real Madridit: “Nuk pendohem që zgjodha Barcelonën në vend të Real Madridit. Kam dëgjuar zemrën në atë vendim.
Arsyeja? Sigurisht që doja të luaja me Messin. Barça ishte skuadra që e dashuroja. E ndiqja gjithmonë, që nga koha e Ronaldinhos dhe gjithmonë thoja: dua të luaj aty. Dhe fatmirësisht ashtu ndodhi”, – u shpreh Neymar me bindje.
Ai kujtoi gjithashtu ditët e nxehta dhe garën mes dy gjigantëve spanjollë për ta marrë nga Santosi: “Ato ditë ishin shumë intensive. Ishin 2-3 ditë ku nuk po stërvitesha fare, vetëm shkoja nga shtëpia në zyrë për të zgjidhur situatën.
