Lajm i mirë për futbollisten libaneze, Celine Haidar, e cila pas një periudhe prej dy muajsh u zgjua nga koma.
“Mjekët nxorën nga koma futbollisten libanez, pas dy muajsh shtrimi në një spital të Bejrutit”, shkruajnë mediat e huaja.
Futbollistja 19-vjeçare u plagos rëndë më 16 nëntor të vitit të kaluar, kur u godit në kokë nga copa guri, pas një bombardimi nga forcat izraelite në zonën Chiyah, në periferinë jugore të Bejrutit.
Siç raporton gazeta libaneze në gjuhën franceze “L’Orient-Le Jour”, futbollistja u zgjua nga koma të hënën më 6 janar. Mjekët thonë se ka shpresë që gjendja e saj shëndetësore të përmirësohet.
Lojtarja e re, e cila luan si mesfushorë në Akademinë e Futbollit të Bejrutit dhe vitin e kaluar fitoi kampionatin libanez me ekipin e saj, ishte shumë pranë vdekjes, por siç pohoi nëna e saj, Sanaa Sahroura në gazetën libaneze: “Ajo luftoi sepse ajo e do jetën. Sapo u zgjua nga koma, na shikoi dhe i thamë: Mbylli sytë nëse na dëgjon. Dhe kur ajo e bëri ne nuk mund ta besonim, e puthëm në të gjithë trupin. Është një gëzim i papërshkrueshëm për ne”.
Për momentin, Haidar është ende me oksigjen dhe nuk është në gjendje të flasë. Ajo transferua në Spitalin Ortodoks Saint George në rrethin Akhrafiye në periferinë lindore të Bejrutit dhe pritet t’i nënshtrohet operacioni në kokë, ndërsa po i nënshtrohet fizioterapisë për të rivendosur lëvizjen në krahun e majtë dhe këmbën e majtë.
