Për 1.9 miliardë myslimanë, Ramazani është muaji i nëntë dhe i shenjtë islamik. Këtë vit filloi më 11 mars. Përgjatë 30 ditëve të Ramazanit shumë myslimanë agjërojnë, duke hequr dorë nga ushqimi, uji, pirja e duhanit e marrëdhëniet seksuale, që nga lindja e diellit e deri ne perëndim.
Agjërimi këshillohet vetëm për të rriturit. Ka përjashtime për njerëzit e sëmurë, në moshë të shtyrë, shtatzënat, nënat gjidhënëse, periudha menstruale apo udhëtimi, raporton “The Conversation”.
Shkenca ka treguar se agjërimi është i mirë për shëndetin. Disa studime që janë bërë në kafshë kanë sugjeruar se agjerimi ndikon në jetë më të gjatë si dhe shëndet më të mirë. Tek njerëzit, studiuesit sugjerojnë së agjërimi ndikon tek pesha trupore, niveli i sheqerit në gjak, kolesterolit dhe shtypja e gjakut, të cilat përmirësohen.
Agjërimi ndihmon edhe shëndetin mendor duke ulur simptomat e depresionit dhe ka përfitime shpirtërore gjithashtu.
Nëpër shumë shtëpi përgatitet ushqim tradicional për të prishur agjërimin, shpesh me ushqime të fërguara e ëmbëlsira. Por alternativa më të shëndetshme konsiderohen të jenë frutat e freskëta – hurmat janë një traditë e shpeshtë.
Kur agjërimi prishet me anë të frutave të freskëta sigurohet mjaftueshëm glukozë për organet, sidomos për trurin.
Kur një person planifikon të agjërojë duhet të pijë shumë ujë, në mënyrë që të qëndrojë i hidratuar gjatë periudhës kur nuk i lejohet të pijë.
Të këshillueshme për syfyr janë ushqimet që përmbajnë karbohidrate të shëndetshme si fasulet, drithërat e plota e yndyra të shëndetshme, sepse këto ushqime e mbajnë organizmin të ngopur më gjatë.
Përveç ushqimit, të rëndësishme janë edhe ushtrimet fizike. Këshillohet që dikush që agjëron të bëjë ushtrimet fizike në mëngjes apo më vonë gjatë mbrëmjes kur temperatura të jetë më e ulët. Gjithsesi kjo nuk do të ndikojë tek dikush që ushtron në ambient të mbyllur.
Njerëzit, profesionet e të cilëve kërkojnë të jenë fizikisht aktivë, duhet të bëjnë kujdes gjatë agjërimit në mënyrë që të mos dehidrohen e të mos pësojnë ndonjë sulm që mund të shkaktohet nga temperaturat e larta.
Duhani konsiderohet si një ndër vrasësit më të mëdhenj në botë dhe ndalohet të konsumohet gjatë agjërimit. Mirëpo gjatë agjërimit lejohet përdorimi i flasterëve që përmbajnë nikotinë.
Nëse agjërimi dikujt ia përkeqëson gjendjen shëndetësore, rekomandohet shmangia e agjërimit. Gjithsesi, shumë njerëz me sëmundje kronike agjërojnë pa problem. Rekomandohet këshilla e doktorit për këdo që ka telashe shëndetësore e që synon të agjërojë.
