Ballafaqimi me të kaluarën është i domosdoshëm për paqe të qëndrueshme dhe të ardhme të suksesshme, ka thënë kryeministri Albin Kurti të shtunën në diskutimin “Kapërcimi i ndarjes: Një bisedë e guximshme”, organizuar nga organizata nga Mbretëria e Bashkuar, “Plan për Paqe” dhe qendra “Barabar”.
Sipas njoftimit nga Qeveria e Kosovës, kryeministri Kurti ka thënë se ky ballafaqim për paqe të qëndrueshme është “proces i shërimit dhe mekanizëm i shëndetshëm për përparim shoqëror dhe njerëzor”.
“Ajo është e drejtë individuale e viktimës dhe familjes dhe e drejtë kolektive, por obligim i shtetit dhe qeverisë që të sigurojë që kjo e drejtë të mundësohet dhe realizohet”, ka thënë ai, sipas njoftimit, duke shtuar se institucionet kanë obligim të dokumentojnë krimet përmes instituteve e muzeve të cilat shërbejnë si instrumente të kujtesës kolektive për gjeneratat e ardhshme dhe që ndihmojnë në ngushëllimin e viktimave duke u siguruar atyre që dhimbjet e tyre nuk do të harrohen.
Për punën e institucioneve në këtë drejtim, Kurti ka thënë se Kosova është në finalizim të Strategjisë Kombëtare për Drejtësi Tranzicionale e se po themelohet edhe Instituti për Hulumtimin dhe Dokumentimin e Krimeve të Kryera gjatë lutës në Kosovë. Po ashtu ka deklaruar se është rritur buxheti i zyrës së Prokurorit Special në departamentin e krimeve të luftës “në mënyrë që të rriten kapacitetet njerëzore dhe profesionale, dhe kemi plotësuar kornizën ligjore që mundëson gjykimin në mungesë për krime të luftës në përputhje me standarde ndërkombëtare si dhe kemi dyfishuar numrin e hetuesve të krimeve të luftës në Drejtorinë e Hetimeve të Krimeve të Luftës në kuadër të Policisë së Kosovës”.
Ky organizim në fokus kishte bashkëbisedimin ndërmjet Jo Barry, që ka humbur babanë e saj nga një bombë e shpërthyer nga IRA në vitin 1984, dhe Pat Magee, personi përgjegjës për vdekjen e babait të Jo Barry. Të dy ndanë tregimin dhe këndvështrimin e tyre mbi rolin që dialogu mund të luajë në shërimin dhe ballafaqimin me të kaluarën. Për tash e 20 vjet, Jo Barry dhe Pat Magee vazhdojnë të takohen dhe së bashku kanë folur në mbi 300 raste të ndryshme e në platforma të shumta për rreth botës.
