Bashkimi Europian do të prezantojë nesër një Plan të Ri, i cili ka si synim të ndihmojë vendet e Ballkanit Perëdimor të ecin më shpejtë në drejtim të BE
TIRANË – Po bëhen 10 vjet që kur më 28 gusht 2014, Kancelarja e atëhershme gjermane Angela Merkel shpalli të famshmin Procesi i Berlinit.
Ai nisi si përpjekje që të përgatitet terreni për futjen në bllok të vendeve të Ballkanit Perëndimor në Bashkimin Evropian.
Në këtë Proces pretendohet të marrin pjesë gjashtë vende të Ballkanit Perëndimor (Bosnja – Herzegovina, Kosova, Mali i Zi, Maqedonia e Veriut, Serbia dhe Shqipëria.
Po ashtu në këtë proces marrin pjesë BE dhe 10 vende anëtare të Unionit, të gjitha nën drejtimin e Gjermanisë.
Atëherë, deklarata finale përshkruante: "Të bëjmë progres shtesë real në procesin e reformës, në zgjidhjen e çështjeve të pazgjidhura dypalëshe dhe të brendshme dhe në arritjen e pajtimit brenda dhe midis shoqërive në rajon, të rrisim bashkëpunimin ekonomik rajonal dhe të hedhim bazat për një rritje të qëndrueshme”.
Pasi po bëhet një dekadë, lind pyetja: Çfarë është bërë për qytetarët, çfarë kanë përfituar ata?
E vërteta është se fare pak ka ndikim deri tani.
Një ndër arritjet konsiderohet marrëveshje për lëvizjen e njerëzve e cila u trumbetua shumë si sukses.
Bëhet fjalë për hyrje-dalje në kufijtë e 6 vendeve të Ballkanit Perëndimor pa nevojën e pasaportës ndërkombëtare, duke mjaftuar karta lokale e identitetit.
Por në të vërtetë, ky proces ka vite që ka ndodhur, shumë më parë Procesit të Berlinit: Shqiptarët lëvizin kështu me Kosovën, Maqedoninë dhe Malin e Zi. Pas marrëveshjes u shtua edhe Serbia.
Një tjetër marrëveshje që konsiderohet arritje është ajo për roaming. U trumbetua shumë si sukses, por e vërteta është se pak gjëra kanë ndryshuar: Interneti në rajon jepet nga kompanitë celulare me pikatore, ndërsa ende nuk bëhet fjalë të zerohen tarifat me vendet e BE.
Tani po bëhen përpjekje të reja: zyrtarisht thuhet se Procesi i Berlinit ka katër objektiva të deklaruara që në fillim të këtij procesi dhe që mbeten të pandryshuara:
zgjidhja e problemeve të brendshme, të hapura dypalëshe mes vendeve të Ballkanit Perëndimor, pajtimi mes shoqërive në rajon, përmirësimi i bashkëpunimit ekonomik rajonal dhe së fundi krijimi i një baze për rritjen e qëndrueshme të rajonit.
Orët e fundit duket se ka një lajm të mirë: Bashkimi Europian do të prezantojë nesër një Plan të Ri, i cili ka si synim të ndihmojë vendet e Ballkanit Perëdimor të ecin më shpejtë në drejtim të Bashkimit Europian./noa.al
