Kryeministri Edi Rama i është përgjigjur kryeministrit grek i cili nuk e ftoi në darkën informale të liderëve të Ballkanit Perëndimor dhe BE-së mbrëmë në Athinë.
Në një reagim në gjuhën angleze Rama thotë se rajoni ka nevojë që Greqia të përfshihet më shumë në rrugën europiane.
Përmes nëj mesazhi të gjatë në Twitter, Rama është shprehur se nuk ka reaguar më herët pasi nuk donte të shtonte më shumë zhurmën që bëri ky takim.
Mes rreshtave kreu qeverisë shprehet i zhgënjyer në lidhje me këtë darkë, të cilën sipas tij do të ishte më mirë të mos e kishte parë, pasi u përdor për t’i dërguar Shqipërisë një mesazh kontradiktor kundrejt qëllimit shumë më ambicioz të nismës.
"Këtu është përgjigja ime për të gjithë ata, në Greqi, Shqipëri apo gjetkë, që komentuan në mënyra të ndryshme ose u hutuan nga mungesa ime në Athinë, por edhe për gazetarët që kërkuan mendimin tim dhe nuk morën përgjigje para ngjarjes. Arsyeja është e thjeshtë: nuk doja të shqetësoja mikpritësin dhe të ftuarit e tij, duke e shtuar zhurmën para se miqtë e mi të mirë të mbledhur në Athinë të përfundonin punën e tyre. Jam i lumtur që Kyriakos mori iniciativën për të thyer bukën me liderët shumë të rëndësishëm dhe për të diskutuar të ardhmen evropiane të Ballkanit në sfondin e agresionit rus. Rajoni ka nevojë që Greqia të përfshihet më shumë në rrugën tonë të përbashkët. Unë i kam thënë gjithmonë atij apo miqve të tjerë grekë, duke e thënë publikisht në disa raste, se sinqerisht besoj se vendi i tyre ka një rol të natyrshëm për të luajtur në Ballkan duke pasur parasysh profilin dhe përvojën e tij në BE.
Shpresoj shumë që takimi të ishte produktiv dhe sigurisht, më mirë të mos e kisha parë darkën e përdorur për t’i dërguar Shqipërisë një mesazh kontradiktor kundrejt qëllimit shumë më ambicioz të nismës dhe shpresoj që ky fakt fatkeq të mos ngatërroi të nderuar të ftuar. Për sa më përket mua, të flasësh, të komunikosh, të debatosh me miqtë, aleatët, partnerët dhe fqinjët në radhë të parë është thelbi i politikës ndërkombëtare dhe të përpiqesh, gjithmonë të përpiqesh, të vendosësh veten në vendin e tjetrit është një domosdoshmëri. Aq më tepër kur gjërat duket se shkojnë keq.
Tetorin e ardhshëm Shqipëria do të kryesojë Samitin e Procesit të Berlinit të këtij viti në Tiranë. Natyrisht, miku im i dashur dhe kolegu shumë i respektuar në Athinë është ftuar të marrë pjesë dhe nuk mund ta imagjinoja kurrë të përgjigjem me nëntë, duke ftuar në vend të tij Presidentin grek, për të cilin kam edhe respektin më të madh. Unë e kuptoj presionin e palëve të treta, të etur për të shfrytëzuar çdo rast për të bërë një mal nga një kodër mole. Por ne të gjithë kemi sfida shumë më të mëdha përpara, ka male të vërteta për t’u ngjitur. Ajo që duhet të na bashkojë në kohë të tilla të trazuara për hir të popullit tonë, vendeve tona, rajonit tonë, Evropës tonë është më e madhe se ajo që na ndan. Shumë është në rrezik globalisht, që ne të bëhemi peng i politikës së brendshme fisnore."-shprehet Rama.
Mitsotakis nuk e ftoi Ramën në takim, duke dërguar ftesë të Bajram Begaj. Ky i fundit e refuzoi. Të gjithë e kuptuan se ishte një manovër e qeverisë greke, e cila dje e ka pranuar hapur. Pas darkës foli zëdhënësi i qeverisë greke, duke vijuar me avazin e kërcënimeve.
“Mendoj se të gjithë e kuptojmë se nuk ishte e mundur të ftohej zoti Rama në një nismë kaq të rëndësishme. Me këtë duam të themi se rruga europiane e Shqipërisë kalon përmes respektimit bazë të normave dhe rregullave të së drejtës europiane. Gjithsesi ka qenë i ftuar presidenti i Shqipërisë, i cili refuzoi pjesëmarrjen”, tha Pavlos Marinakis.
Darka joformale në Athinë u organizua me rastin e 20 vjetorit të Samitit BE-Ballkani Perëndimor dhe “Deklaratës së Selanikut”. Aty morën pjesë liderët e Kosovës, Maqedonisë, Serbisë dhe shefja e KE, Ursula Von der Leyen.
Athina dhe Tirana janë përplasur ashpër për rastin e Belerit. Edhe pse ky i fundit u kap duke blerë vota, Athina i ka dhënë të drejtë vetes të kundërshtojë drejtësinë dhe të kërkojë lirimin e tij. Drejtësia deri më tani nuk i është bindur dhe kanë filluar kërcënimet me ndërprerje fondesh dhe bllokim të integrimit.
